3 katao niratrat sa tricycle patay

KORONADAL CITY – Tatlo ang patay sa pananambang sa Brgy. Estado, Matalam, North Cotabato, bandang 6:30 p.m. kamakalawa.

Kinilala ang mga biktimang sina Joey Delloso, 31-anyos, may asawa, driver at residente ng Poblacion, Matalam; Ramel Quijano, residente ng Brgy. Estado, Matalam; at Geofrey Lauria, may asawa, bankero ng larong toss coin o hantak, at residente ng Carmen, North Cotabato.

Ayon sa impormasyon, sakay ang tatlong biktima ng isang tricycle at binabaybay ang Sitio Esmar nang paulanan ng bala gamit ang M14 rifle ng hindi nakilalang mga suspek.

Napag-alaman, papunta sana ang mga biktima sa Brgy. Estado upang maglaro ng hantak nang mangyari ang insidente.

Patuloy ang imbestigasyon ng Matalam PNP upang malaman ang motibo at ang mga suspek sa likod ng naturang krimen.