‘Sweet 16’ pinilahan ng 3 holdaper (Sa harap ng boyfriend)

KALIBO, Aklan – Pinilahan ng tatlong lalaki ang 16-anyos dalagita sa harap ng kanyang nobyo makaraan sila ay holdapin sa isang sementeryo sa Calachuchi Road, Brgy. Andagao, Kalibo, Aklan kamakalawa.

Kasong rape at robbery ang kinakaharap ng mga suspek na kinilalang sina Merwin Pelayo, 24; Dariel Soguilon, 20, kapwa residente ng Ibajay, Aklan, at ang 17-anyos menor de edad na taga-Libacao, Aklan.

Ang mga suspek ay naaresto sa isinagawang follow-up operation ng Kalibo PNP station.

Base sa salaysay ng magnobyo na itinago sa pangalang “Hanna” at “Jun,” naglalakad sila pauwi at dumaan sa naturang sementeryo nang harangin ng tatlong suspek at sila ay hinoldap.

Kinuha ng mga suspek ang mga cellphone at pera ng magkasintahan at saka tinanong kung sila ay may relasyon.

Kinaladkad silang dalawa sa gitnang bahagi ng sementeryo at ginahasa ang dalagita sa harap ng boyfriend na walang nagawa.

Nang makaraos ang tatlong suspek ay pinakawalan ang mga biktima.

Nagkaroon ng lakas ng loob na magreklamo ang magkasintahan sa pulisya dahilan kaya agad na isinagawa ang dragnet operations at naaresto ang mga suspek.