2 katao  itinumba sa Taguig

KAPWA binawian ng buhay ang isang lalaki at isang babae makaraan pagbabarilin ng dalawang hindi nakilalang lalaking lulan ng motorsiklo kahapon ng umaga sa pumping station ng MMDA sa Taguig City.

Kinilala ang mga biktimang sina Razonilo Prudencio, 55, ng #18 Capistrano Compound, Brgy. Ibayo Tipas, at Emerita Ramos, 60, ng Lot 3-4, Block 2, HR Capistrano  St., ng nasabing barangay, kapwa ng naturang lungsod.

Base sa report na natanggap ni Sr. Supt. Arthur Felix Asis, hepe ng Taguig City Police, naganap ang insidente  dakong 9:30 a.m. sa MMDA pumping station sa C-6 Road, Brgy. New Lower Bicutan  ng naturang lungsod.

Sakay ang dalawang biktima ng isang motorsiklo nang huminto para bumili ng isda.

Ngunit biglang sumulpot ang isang motorsiklo at pinagbabaril ng dalawang suspek ang mga biktima.

Jaja Garcia