Energy Sec. Petilla nagbitiw na — PNoy

LIMANG araw makaraan magbitiw si John “Sunny” Sevilla bilang Customs chief, inamin kahapon ni Pangulong Benigno Aquino III ang pagbibitiw ni Energy Secretary Jericho Petilla.

Sinabi ng Pangulo, tinanggap na niya ang pagkalas ni Petilla sa kanyang gabinete at naghahanap na siya ng kapalit ng opisyal sa puwesto.

Katuwiran ng Pangulo, napilitan lang naman si Petilla na maluklok bilang Energy secretary  dahil alam niya ang hirap ng responsibilidad sa sektor ng enerhiya.

Ayon kay Pangulong Aquino, halimbawa rito si dating Energy Secretary Jose Rene Almendras na maging ang anak daw na nasa grade school ay nabu-bully dahil sa mataas na presyohan sa langis o koryente.

Matatandaan, binigo ng Kongreso ang inihihirit na emergency powers ni Petilla para kay Pangulong Aquino para malutas daw ang napipintong energy crisis ngayong panahon ng tag-init.

Rose Novenario