2 holdaper tiklo sa court hearing

NAARESTO ng Quezon City Police District (QCPD) ang isa sa miyembro ng Cuya robbery group at isang kasamahan habang dumadalo sa pagdinig ng kaso sa City Hall of Justice ng lungsod kahapon.

Ayon kay Chief Insp. Rodel Marcelo, hepe ng QCPD-Criminal Investigation and Detection Unit, kinilala ang mga naaresto na sina Rodolfo Lalata alyas Joel Manalo, 24, ng 13-A Sto. Cristo, Balintawak, Quezon City at Arnel Cahinhinan, 33, ng Brgy. Balingasa ng naturan ding lungsod.

Ang dalawa ay naaresto ng QCPD-Theft and Robbery Section sa pangunguna ni Insp. Alan dela Cruz, sa bisa ng warrant of arrest na ipinalabas ni Hon. Roberto Buenaventura, presiding judge ng QC Regional Trial Court Branch 86, sa kasong robbery in band, nang maispatan sa QC Hall of Justice Complex habang dumadalo sa court hearing dakong 10 a.m.

Tinangka pang tumakbo patakas ng dalawa nang makita ang mga awtoridad ngunit agad silang nadakma ng mga nakaantabay na iba pang tropa ng CIDU.

Nang siyasatin si Cahinhinan, nakuha mula sa kanya ang isang sachet ng shabu dahilan para ipagharap siya ng kasong paglabag sa Republic Act 9165 o Comprehensive Dangerous Act of 2002.

Si Lalata ay itinuturong sangkot sa kasong riding in tandem, robbery hogtied at robbery holdup sa lungsod simula taon 2012, 2013 at 2014.

Almar Danguilan