Recall election sa Bulacan  tuluyang ibinasura

TULUYAN nang ibinasura ng Commission on Elections (Comelec) ang ikinakasang recall election para palitan si Bulacan Governor Wilhelmino Sy-Alvarado. 

Sa 16-pahinang omnibus resolution, ipinaliwanag ng Comelec ang dalawang pangunahing punto kung bakit hindi matutuloy ang isinusulong na recall election. 

Una, kapos ang 138,506 beripikadong pirma para patunayan ang kagustuhan ng mga Bulakenyo na palitan si Alvarado. 

Batay sa Sec. 6 ng Comelec Resolution 7505, kinakailangang makakalap ng 183,070 pirma o 10-porsyento ng kabuuang bilang ng mga botante sa Bulacan. 

Bagama’t umabot sa 319,797 ang naunang isinumiteng bilang ng mga pirma, lumabas na 181,201 dito ay hindi valid. 

Ikalawa, iginiit ng Comelec na kulang na sa oras para magsagawa pa ng recall election. 

Batay sa Section 74 ng Local Governmment Code, ipinagbabawal ang pagsasagawa ng recall election isang taon bago ang papalapit na halalan. 

Dahil magkakaroon ng national elections sa Mayo 9, 2016, lahat ng recall election ay dapat isagawa bago ang Mayo 8, 2015.