Mag-ina, kasambahay pinatay at sinunog

HINIHINALANG pinatay muna bago sinunog ang mag-ina at ang kanilang kasambahay ng hindi nakilalang mga suspek kahapon ng madaling-araw sa Parañaque City.

Kinilala ni Parañaque City police chief, Sr. Supt. Ariel Andrade, ang mag-inang biktima na sina Czarina Luya, 35, at Charlene, 15, patay rin ang kasambahay nilang si Josephine, pawang mga residente ng 11 Tomas St., Multinational Village, Brgy. Moonwalk ng lungsod.

Ang mga biktima ay pawang may malalim na sugat sa noo at ulo.

Ayon kay Parañaque City Fire Department arson  chief investigator, Inspector Wilson Tana, nagsimula  ang sunog sa bahay ng mga biktima na bungalow type dakong 12:58 a.m.

Aniya, ang mga biktima ay pawang natagpuan sa loob ng kuwarto ng kasambahay at may nakitang mga bahid ng dugo, palatandaan na hinila sila papasok sa nasabing silid.

Nang maapula ang apoy dakong 2:30 a.m., may natagpuang basyo ng bala ng hindi pa nabatid na kalibre ng baril sa sala ng bahay.