Napoles naibiyahe na sa Correctional  

NAILIPAT na si Janet Lim-Napoles sa Correctional Institute for Women sa Mandaluyong City mula sa Camp Bagong Diwa, Taguig City pasado 1 a.m. kahapon.

Isinakay ang tinaguriang pork barrel scam queen sa Bureau of Jail Management and Penology (BJMP) armored service vehicle.

Una rito, dinala ng Sandiganbayan sheriff ang commitment order kay Napoles.

Ayon kay BJMP Metro Manila public information officer Inspector Aris Villaester, bandang 1:35 a.m. nang makarating ang akusado sa Women’s Correctional.

Siniguro ng BJMP na walang special treatment na ibibigay kay Napoles.

Bago ito, hiniling ng kampo ni Janet Napoles sa Sandiganbayan na payagan siyang manatili sa BJMP detention facility.

Ngunit lumalabas sa mismong pag-amin ni Dr. Edilinda Patac, officer-in-charge sa correctional, congested na ang kanilang mga piitan.

Para sa mga abogado ni Napoles, sana ay ikonsidera ang kalusugan at seguridad ng kanilang kliyente.

Jaja Garcia