Pulis todas, 5 pa sugatan sa shootout

PATAY ang isang pulis habang sugatan ang tatlo niyang kabaro at dalawang bystander nang makabarilan ng mga awtoridad ang apat kalalakihan sa operasyon kamakalawa ng gabi sa Navotas City.

Hindi na umabot nang buhay sa Tondo Medical Center si PO1 Julius Mendoza sanhi ng isang tama ng bala ng kalibre .45 sa ulo. Habang ginagamot sa Chinese General Hospital sina PO2 Aldeen Legazpi, PO1 Isaac Orellanes at PO1 Rolando Cruz, pawang mga miyembro ng Navotas City Police.

Sugatan din ang dalawang bystander na sina Ronaldo Gutierrez, 33, at Fernando Sevilla, 37, kapwa ng nasabing lugar.

Sa impormasyon mula kay Northern Police District (NPD) director, Chief Supt. Jonathan Ferdinand Miano, dakong 11:30 p.m. nang magsagawa ng operasyon ang mga tauhan ng Intelligence Division ng Navotas City Police hinggil sa pinagkukutaan ng ilang most wanted person sa loob ng Market 3, Navotas Fish Port Complex, Brgy. North Bay Boulevard North ng nasabing lungsod.

Pagpasok ng mga awtoridad ay sinalubong sila ng bala ng mga suspek na kinabibilangan nina alyas Puti Valdez, Awing Mendoza, Wawang, at Itong, sinasabing kabilang sa mga pinaghahanap ng batas.

Inimbitahan ng mga awtoridad ang 45 katao sa lugar kabilang sina Angelito Castro alyas Itong, 36, at Juan Batobalonos alyas Wawang, 23, kapwa residente ng Market 3 ng nasabing barangay, positibong kinilala ng mga pulis na siya nilang nakasagupa sa lugar.

Rommel Sales