2 dalagita nasagip sa human trafficking

NASAGIP ng mga awtoridad ang dalawang dalagitang hinihinalang biktima ng human trafficking, mula sa isang pension house sa Brgy. Canelar, Zamboanga City kamakalawa.

Ang mga biktimang may gulang na 17-anyos at 19-anyos ay mula sa isang bayan sa Bulacan.

Ayon sa salaysay ng mga biktima, anim na araw silang nanatili sa loob ng Atilano Pension House makaraan silang iwanan ng recruiter na nakilala lamang nila sa cellphone.

Anila, ni-recruit sila ng isang alyas Epa sa pamamagitan ng text para magtrabaho sa Malaysia.

Napag-alaman ng mga awtoridad, bukod sa dalawang nasagip ay may dalawang biktima pang taga-Bulacan din ang una nang nakaalis papunta sa lalawigan ng Tawi-Tawi. 

Ayon sa ulat ng Women and Children Protection Desk ng Zamboanga City PNP, pinaniniwalaang dumaan ang mga biktima sa tinuguriang ‘back door’ ng bansa sa pamamagitan ng Tawi-Tawi.

Ang dalawang nasagip ay nasa kustodiya na ng Department of Social Welfare and Development (DSWD) sa lalawigan.

Micka Bautista