HATAW! D'yaryo ng Bayan hatawtabloid.com
ni ARABELA PRINCESS DAWA
BUMAWI si GM Wesley So sa 10th at penultimate round ng 2015 U.S. Championship sa Saint Louis USA matapos ma forfeit ang laro niya sa round 9.
Kinalos ni 21-year old So si defending champion GM Gata Kamsky (elo 2683) matapos ang 56 moves ng Queen’s Pawn Game.
Nakaipon si world’s No. 8 So (elo 2788) ng 5.5 points upang upuan ang fourth spot sa event na may 12-player at ipinatutupad ang single round robin.
Nahimasmasan ng bahagya si So matapos ang nakalulungkot na pagkatalo nito kay GM Varuzhan Akobian dahil na-forfeit ang laro ng Pinoy nang magreklamo ang huli.
Inangal ni Akobian (elo 2622) sa arbiter ang pagsusulat ni So sa isang papel.
Kinausap na si So at binigyan ng dalawang warning kaya naman sa pangatlo ay nagdesisyon ang chief arbiter na si Tony Rich na itigil ang laban at ibigay kay Akobian ang panalo.
Samantala, mag-isa pa rin sa unahan si top seed GM Hikaru Nakamura (elo 2798) hawak ang 7 pts. matapos makipaghatian ng puntos kay GM Ray Robson sa 30 sulungan ng Four Knights Game.
Hawak ni Robson ang pangalawang puwesto tangan ang 6.5 points habang nakaupo sa pangatlo si GM Alexander Onischuk (elo 2665).
Makakatunggali ni So sa 11th at last round si GM Kayden Troff (elo 2532) na tumabla kay GM Timur Gareev.
Si Troff ay kasalo nina Kamsky at Akobian sa fifth to seventh places na may tig limang puntos.
Makakalaban ni Nakamura si Onischuk habang katapat ni Robson si Gareev.
