Ang mga ‘Cancer Hotel’ sa Tsina

Kinalap ni Tracy Cabrera

NAKAPAGHANDA na si Li Xiaohe sa kanyang kalagayan sa loob ng maliit nguni’t maaliwalas niyang silid sa western Beijing, hindi kalayuan sa pinakasikat na cancer hospital sa Tsina. Habang pinapatuyo ang kanyang labada sa nakasabit na mga hanger, nagluluto naman ang kanyang mister bago magsimula si Li ng 84-araw na chemotherapy, kasunod ng pag-alis ng bahagi ng kanyang kanang dibdib.

Nakatira ngayon ang 43-taon-gulang na neighborhood watch leader sa Henan province sa lumalaganap na mga ‘cancer hotel’ na nagsusulputan ngayon malapit sa ospital para mabigyan ang libo-libong cancer patients ng affordable at cozy na tirahan habang naghihintay sa kanilang mga appointment at sumailalim sa outpatient treatment.

Kamakailan, kapansin-pansin ang pagtaas ng bilang ng mga kaso ng lung, bowel at breast cancer sa Tsina kung kaya ang mga hotel tulad ng tintirhan ni Li ay mabilis din nagsulputan sa mga lungsod tulad sa Beijing at Shanghai, bilang ad hoc response sa lamalaganap na health crisis.

“Iba kasi iyong treatment doon sa amin kaya pumunta kami rito,” paliwanag ni Li habang namamahinga sa kanyang silid, na sa sobrang kaliitan ay halos mapuno ng kanyang higain.

“Sa aking pinanggalingan, sagot ng insurance ko ang 85 porsyento. Dito masuwerte na kung makuha ko ang kalahati Pero ginagawa ko ito para sa aking kalusugan. Hinahanap ko ang tamang treatment para sa aking karamdaman,” dagdag niya.

Hindi man nakapagbibigay ang mga cancer hotel ng nursing para sa mga pasyente, nailalagay naman sa lugar na malapit sa serbisyong medikal at mga doktor, at nakapagbibigay puwang para makapagluto at makipag-ugnayan sa kanilang kapwa pasyente.