Yaya’s meal inalmahan ng DoLE  

ITINURING na “discriminating” ni Labor Secretary Rosalinda Baldoz ang paraan ng pagtrato sa mga yaya ng isang mamahaling resort sa lalawigan ng Quezon.

Ang reaksiyon ni Baldoz ay kasunod ng ulat na lumutang nitong nakaraang Semana Santa kaugnay nang iniaalok na “yaya’s meal” sa Balesin Island Club.

Ayon kay Baldoz, ang pagbansag ng “yaya’s meal” sa pagkaing iniaalok sa mga kasambahay na kasamang nagbabakasyon ng kanilang mga amo sa nasabing resort ay maituturing na discriminatory act, bagamat hindi ito maituturing na paglabag sa umiiral na batas sa paggawa.

Ngunit ang nakalulungkot aniya, ang pagkakaroon ng “yaya’s meals” ay nagpapakita na ilang sektor pa rin sa ating lipunan ang may mababang pagtingin sa mga kasambahay.

Para sa kalihim, sinadya man o hindi ang pagbansag sa “yaya’s meal,” ito ay nagkakait pa rin sa dignidad ng mga kasambahay bilang mga manggagawa.

Nakalulungkot aniya na lumulutang ang ganitong pagtrato sa harap nang pagsusulong ng kagawaran na makilala sa lipunan ang mga kasambahay bilang bahagi ng pambansang puwersa ng paggawa.

Leonard Basilio