School principal utas sa boga ng spotlight operator

BINARIL at napatay ang 69-anyos school principal ng isang spotlight operator na sinasabing natitigan nang masama ng biktima kahapon ng umaga sa Muntinlupa City.

Binawian ng buhay bago idating sa Muntinlupa City Medical Center ang biktimang si Editha Tabor, principal sa isang pribadong paaralan sa Cavite, residente ng 2321 Oakland St., Park Homes, Brgy. Tunasan, Muntinlupa City, bunsod ng  dalawang tama ng bala sa ulo mula sa kalibre .38 baril.

Nakakulong na sa Muntinlupa City Police detention cell  ang suspek na si Artemio Solayao, 42, ng FTI, Brgy. Western Bicutan, Taguig City.

Base sa report na natanggap ni Muntinlupa City Police chief, Sr. Supt. Allan Nobleza, naganap ang insidente dakong 7:20 a.m. sa harapan ng Tunasan Market, National Road, Brgy. Tunasan ng naturang lungsod.

Nag-aabang ng masasakyang jeep  ang biktima patungo sa kanilang paaralan, nang hindi sinasadyang matitigan ang suspek.

Ikinagalit ito ng suspek kaya nilapitan ang biktima at sinita na humantong sa mainitang pagtatalo. Pagkaraan ay bumunot ng baril ang suspek at pinaputukan sa ulo ang ginang.

Jaja Garcia