Kusinera dedbol sa bundol ng kotse (Naputulan ng 2 hita)

PATAY ang isang babae makaraan mabundol ng kotse habang pasakay ng jeep sa Sucat, Muntinlupa City nitong Huwebes ng umaga. 

Naputulan ng magkabilang hita ang biktima nang maipit sa estribo ng jeep dahil sa lakas nang pagsalpok sa kanya ng kotse sa kanto ng Villoco Street at West Service Road. 

Kinilala ang biktimang si Shirley Rabusa, 56, kusinera sa isang pamilya sa South Bay Subdivision. 

Bago ang insidente, nakausap ng street sweeper na si Lucia Macarubo ang biktimang madalas mag-abang ng jeep sa lugar kapag papunta sa Alabang para mamalengke tuwing madaling araw. 

Habang kuwento ni Vermillo Gordon, driver ng jeep na sasakyan sana ni Rabusa, nakatalikod na ang biktima at papasok ng jeep kaya hindi niya napansin ang humaharurot na kotse sa likuran.

Abswelto sa insidente si Gordon na nasa tamang lugar nang magsakay ng pasahero.

Samantala, hawak na ng mga awtoridad ang driver na nakabangga kay Rabusa na si Jose Emmanuel Ranola, 25-anyos.

Ayon sa ilang saksi, amoy alak ang driver at nagtangka pang tumakas makaraan ang insidente.

Nahaharap si Ranola sa kasong reckless imprudence resulting in homicide and damage to property.

Jaja Garcia