HATAW! D'yaryo ng Bayan hatawtabloid.com
ni James Ty III
NANINIWALA ang isa sa 40 Greatest Players ng Philippine Basketball Association na si Jerry Codiñera na dapat irespeto ng mga tagahanga ng liga ang mga dagdag na manlalaro na inilagay sa listahan.
Ito’y reaksyon ni Codinera sa mga hinaing ng ilang mga kritiko, tulad ni Fortunato ‘Atoy’ Co na kumuwestiyon sa pagdagdag ng mga manlalaro na sa tingin nila ay hindi karapat-dapat isali sa listahan.
“It is out of our control. Siguro, in the next batch, I hope na isama nila ‘yung mga players na na-overlook,” wika ni Codinera. “For me, all these players na kasama ko sa listahan are all good players. When you talk about MVP, whether you won or not, anybody can win that award. Judgment ng pumipili iyan. It’s a matter kung sino ang early or late pero I don’t question their talent.”
Ilan sa mga manlalaro na hindi isinama ng search committee ng PBA para sa 40 Greatest ay sina Abe King, ang yumaong Arnie Tuadles, Nelson Asaytono, Olsen Racela at Danny Seigle.
Sa ginanap na 40th anniversary ng PBA noong Miyerkoles sa Resorts World Manila, ilan sa mga manlalarong isinali sa 40 Greatest ay sina Asi Taulava, Eric Menk, Kelly Williams, Jayjay Helterbrand, Jimmy Alapag, Mark Caguioa, Arwind Santos, Jayson Castro, Marc Pingris, Kerby Raymundo, Chito Loyzaga at Marlou Aquino.
Nauna si Codinera sa 25 Greatest Players na pinili ng liga noong 2000.
Sa ngayon ay abala si Codinera sa pagiging coach ng Arellano University sa NCAA.
