Bill Gates bumisita sa IRRI

BINISITA ng Microsoft co-founder na si Bill Gates ang International Rice Research Institute (IRRI) sa Los Baños, Laguna nitong Miyerkoles. 

Ayon ito sa pahayag ng ilang sources makaraan mapabalitang dumating sa Filipinas nitong Sabado ang kinikilalang pinakamayamang tao sa buong mundo.

Ang American businessman at philanthropist na si Gates at misis niya ay kapwa chairperson ng Bill and Melinda Gates Foundation. Sila rin ang pinakamalaking private donor ng IRRI sa tinatayang $18 milyon na ayuda kada taon. 

Nasa $100 milyon ang taunang budget ng organisasyon para sa global operation nito. 

Pinaigting ang seguridad sa global headquarters ng IRRI sa loob ng UP Los Baños campus. Bagama’t tumanggi ang mga opisyal na kompirmahin ang presensya ni Gates, inihayag nilang nagtungo sa kanilang tanggapan ang Agriculture Development head ng IRRI global na si Pamela Anderson. 

Inilalarawan ng IRRI ang sarili bilang “the world’s premier research organization dedicated to reducing poverty and hunger through rice science.” Taon 1960 itinatag ang organisasyon na may mga opisina sa 17 bansa.