47-anyos arestado sa sextortion vs 16-anyos dalagita

NAGA CITY – Bagsak sa kulungan ang isang 47-anyos lalaki makaraan ang ‘sextortion’ sa 16-anyos dalagita sa Candelaria, Quezon.

Nabatid na pinipilit ng suspek na si Reginaldo Tesico na muling makipagkita at makipagtalik sa kanya ang biktima dahil kung hindi ay ilalabas niya ang kanilang sex video.

Sinasabing araw-araw inuulan ng text ang biktima galing sa suspek at pinipilit na makipagtagpo.

Bunsod nito, hindi na nagdalawang isip pa ang ina ng biktima na dumulog sa pulisya upang ireklamo ang suspek.

Isang  entrapment  operation ang ikinasa ng mga awtoridad na naging daan para sa tuluyang pagkakadakip sa suspek.

Sa ngayon, inihahanda na ang kasong paglabag sa RA 7610 laban sa suspek.

Samantala, nagsisisi ang isang lalaki makaraan ang panghahalay sa kanyang 10-anyos na pamangkin sa Catanuan, Quezon.

Sa inisyal na imbestigasyon ng pulisya, habang natutulog ang biktima sa kanilang bahay katabi ang kanyang lolo nang dumating ang 22-anyos suspek at binuhat papunta sa kuwarto ang bata. Agad hinubad ng suspek ang salawal ng biktima kasunod nang paghuhubad din ng kanyang saplot saka isinagawa ang panghahalay.

Pumalag ang biktima ngunit dahil sa kalakasan ng suspek ay wala siyang nagawa hanggang sa mailugso ang kanyang puri.

Inihahanda na ang kasong paglabag sa RA 8353 laban sa suspek.