2 holdaper patay sa enkwentro sa Cavite

PATAY ang dalawang suspek sa panghoholdap makaraan makipagbarilan sa mga pulis sa Imus, Cavite nitong Linggo.

Isang sangay ng LBC ang nilooban ng mga lalaking suspek sa Brgy. Bucandala dakong 11:20 a.m. kahapon.

Kuwento ng empleyadang si Janela Aquino, “Nag-declare po sila ng holdap tapos po pinatungo kami. Huwag daw po kaming titingin. Tapos noong nakuha po ‘yung mga pera, pinapasok po kami ng CR ng branch.”

Tinatayang P10,000 ang natangay ng mga suspek na nakatakas sakay ng motorsiklo.

Natunton ang mga suspek makaraan itawag ng isang concerned citizen ang kanilang lokasyon.

Inabutan ng mga pulis ang mga suspek sa isang bukid ngunit nakipagpalitan ng putok kaya sila napatay.

Ayon kay Sr. Supt. Jonnel Estomo, hepe ng Cavite Police, itinuturong responsable rin ang mga suspek sa panloloob sa sangay ng LBC sa Brgy. Burol I, Dasmariñas nitong Sabado.

Sangkot din aniya ang dalawa sa ilan pang insidente ng holdapan sa Cavite.

Inaalam pa ng pulisya ang pagkakakilanlan ng mga suspek.