Bagyo papasok sa biyernes santo — PAG-ASA

MALAKI ang posibilidad na maging ganap na bagyo ang low pressure area (LPA) sa karagatang Pasipiko na nagbabantang pumasok sa Filipinas sa su-sunod na linggo.

Ayon kay Gener Quitlong ng Pagasa-DoST, maaaring pumasok na Philippine area of responsibility (PAR) ang sama ng panahon sa Biyernes Santo at maaaring isa na itong tropical depression o bagyo na papangalanang Chedeng.

Hindi pa matiyak ng Pagasa kung magkaroon ng landfall ang naturang sama ng panahon dahil maaaring dumiretso ito sa Timog Japan o kaya ay tumbukin ang Luzon.

Ngunit ayon kay Quitlong, kahit hindi mag-landfall, sa lawak ng sirkulasyon ng sama ng panahon ay maaaring mararamdaman na ang mga pag-ulan sa Luzon sa Sabado de Gloria o Linggo.

Ang tanging tiyak aniya ngayon ay papasok ito sa karagatang sakop ng Filipinas.