Agusan Norte gov ligtas sa ambush

BUTUAN CITY – Patuloy ang imbestigasyon ng pulisya sa bayan ng Nasipit, Agusan del Norte sa pananambang sa convoy ni Governor Ma. Angelica Rosedell Amante-Matba dakong 11:30 a.m. kahapon na nagresulta sa pagkasugat ng isa niyang police escort.

Kinilala ang biktimang si PO1 Vincent Salvador, miyembro ng Provincial Public Safety Company ng Provincial Police Office, tinamaan sa kanyang kaliwang braso.

Napag-alaman mula kay SPO4 Zaer Peroy, ligtas sa pananambang sina Gov. Matba, Nasipit Municipal Mayor Enrico Corvera pati na ang iba pa nilang kasamang mga pulis.

Napag-alaman, nagmula ang grupo ng gobernadora sa turn over ng school building sa Purok 8, Sitio Mimbahandi sakop ng Brgy. Camagong sa naturang bayan.

Dakong 4 a.m. kahapon nang magsadya sa nasabing lugar ang mga opisyal kasama ang escort na mga personahe ng PPSC at papauwi na sana nang paputukan ng armadong grupo.

Saglit lang ang pangyayari dahil tumakas agad ang  pinaghihinalaang mga rebeldeng New People’s Army (NPA) nang sila’y paulanan din ng bala ng escort policemen ng opisyal.