HATAW! D'yaryo ng Bayan hatawtabloid.com
ni James Ty III
TULOY pa rin ang paghahanda ng University of the Philippines men’s basketball team para sa darating na Season 78 ng University Athletic Association of the Philippines kung saan ito ang magiging punong abala.
Habang wala pang kinukuhang permanenteng coach, ang Amerikanong trainer na si Joe Ward ang pansamantalang hahawak sa Maroons na kasali sa Filsports Basketball Association, bukod sa mga pre-season tournaments na sasalihan nila sa susunod na buwan.
Hanggang ngayon ay inaayos pa ng search committee ng UP ang paghanap ng bagong coach na papalit kay Rey Madrid na sinibak pagkatapos na isang panalo lang ang naitala ng Maroons noong Season 77.
“It’s too early to tell but we’re working our way towards being ready for the UAAP,” wika ni Ward na dating athletic trainer ng Barangay Ginebra San Miguel sa PBA. “I’m ready for the challenge (kung pipiliin ako bilang permanenteng coach). If we play well, we can beat a lot of people. We’re going to play hard on defense and we will run a lot.”
Ilan sa mga kandidato para sa pagiging bagong coach ng UP ay sina Ward, Eric Gonzales, Caloy Garcia, Siot Tanquingcen, Bong Ramos, Frankie Lim, Allan Gregorio at Beaujing Acot.
