20-anyos bebot dinukot ng kelot

NAILIGTAS ng mga tauhan ng Manila Police District PS 5 ang isang 20-anyos babae  sa follow-up operation sa Valenzuela City kamakalawa makaraan dukutin ng isang 23-anyos lalaki nitong Marso 15 sa Roxas Blvd., Ermita, Maynila.

Nakapiit na himpilan ng pulisya ang suspek na si Ibrahim Giama, walang asawa, ng Block 15, Baseco Compound, Tondo, Maynila, sinampahan ng kasong serious illegal detention, physical injury in relation to R.A. 9262 (Anti-Violence Against Women and Their Children Act of 2004).

Ayon kay Supt. Romeo Juan Macapaz, hepe ng Ermita Police Station 5, dakong 12:49 p.m. nang matagpuan ang biktimang itinago sa pangalang Michelle, sa isang bahay sa Mapulang Lupa, Valenzuela City.

Nauna rito, noong Marso 15, naglalakad ang biktima kasama si Marissa Gaa, 40, sa Roxas Blvd.  patungo ng Luneta nang lapitan sila ng suspek at pilit na isinakay sa tricycle si Michelle.

Nang makarating sa Intramuros, sinabi ng suspek na ihahatid niya ang biktima sa kanilang bahay sa Baseco Compound, Tondo, Maynila ngunit nagulat siya nang dalhin siya sa Valenzuela City.

Habang agad nagtungo si Gaa sa himpilan ng pulisya at ini-report ang insidente. 

Sa follow-up operation ng mga tauhan ng MPD PS 5 at sa tulong ng mga tauhan ng Valenzuela City Police PCP 12, natunton ang kinaroroonan ng biktima at nasagip habang naaresto ang suspek na lango sa alak at droga.         

Leonard Basilio