2 patay, 3 sugatan sa sunog sa Kyusi

PATAY ang dalawa katao habang tatlo ang sugatan nang tupukin ng apoy ang 15 kabahayan sa Brgy. Gulod, Novaliches, Quezon City kahapon ng madaling-araw.

Sa ulat ni Quezon City Fire Marshall, Sr. Supt. Jesus Fernandez, kinilala ang mga biktimang namatay na sina Michael Perez, 20, at Raymel Santos, 10, kapwa dumanas ng 3rd degree burn sa kanilang katawan.

Habang sugatan sina Rose Ann Cervano, 24; Elena Cabrera, 64; at Rosalie Serbano, 43-anyos.

Sa imbestigasyon ng pulisya, dakong 10:30 p.m. nang sumiklab ang apoy sa bahay ng isang nangangalang Ramon Latona sa Margarita St., Brgy. Gulod.

Dahil karamihan sa mga bahay sa lugar ay gawa lamang sa kahoy, mabilis na kumalat ang apoy at nilamon ang 15 kabahayan.

Naapula ng mga bombero dakong 12:30 a.m. ang sunog na umabot ng ikatlong alarma.

Sa paunang imbestigasyon, napag-alaman na itinapong upos ng sigarilyong may sindi ang pinagmulan ng sunog sa bahay ni Latona.

Almar Danguilan