Napeñas sinisi rin ng MILF sa Mamasapano incident

KORONADAL CITY – Sinisisi rin ng Moro Islamic Liberation Front (MILF) si dating SAF Director Getulio Napeñas sa Mamasapano encounter na ikinamatay ng 44 PNP-SAF at 18 sa kanilang panig.

Ayon kay MILF First Vice Chairman Ghadzali Jaafar, ang SAF ang unang nagpaputok sa combatants ng MILF na nagresulta sa madugong enkwentro.

Bukod dito, hindi rin aniya nakipag-ugnayan si Napeñas sa MILF sa pagsasagawa ng operasyon kahit may negosasyon ang kanilang panig sa gobyerno ng Filipinas.

Ipinakita lamang aniya ni Napeñas na wala siyang tiwala sa MILF at itinuring pang kaaway ang grupo.

Samantala, hindi nagbigay ng komento ang MILF official kung dapat ding managot si Pangulong Benigno “Noynoy” Aquino III sa Mamasapano encounter.