Napahiya sa kainoman kelot nagbigti (Inaway ng dyowa)

MAKARAAN awayin ng kanyang live-in partner sa harap ng kanyang kainoman, nagbigti ang isang lalaki sa loob ng banyo ng kanilang bahay kamakalawa ng gabi sa Malabon City.

Hindi na umabot nang buhay sa Manila Central University (MCU) Hospital ang biktimang si Leonardo Morales, 21-anyos, ng 25 Interior Aracity St., Brgy. Tinajeros ng nasabing lungsod.

Batay sa ulat ni SPO2 Ananias Birad Jr., dakong 9 p.m. nang matuklasan ang nakabigting biktima sa loob ng banyo.

Nauna rito, kainoman ng biktima ang kanyang kapatid na si Emmanuel nang bigla na lamang awayin ng kinakasamang si Gerlie Labrador sa hindi nabatid na dahilan.

Bunsod nito, nagpaalam ang biktima sa kainoman at nagtungo sa banyo. Ngunit dahil matagal na hindi bumabalik ang biktima ay tinungo ni Emmanuel ang banyo at natuklasang nakabigti na si Leonardo.

Rommel Sales