23 BIFF, 2 sundalo utas sa enkwentro

PATAY ang 23 miyembro ng Bangsamoro Islamic Freedom Fighters (BIFF) sa pagpapatuloy ng all-out offensive ng Armed Forces of the Philippines (AFP) laban sa mga rebelde sa Maguindanao. 

Napatay rin ang dalawang sundalo habang sugatan ang dalawa pa nilang kasamahan sa panibagong serye ng bakbakan sa Brgy. Pusao, Sharif Saidona Mustapha; at Datu Salibo at Datu Piang nitong Martes hanggang Miyerkoles. 

Sinasabing malalapit na tauhan ng international terrorist na si Basit Usman ang grupong nakasagupa ng AFP. 

Batay sa taya ng militar, umabot na sa 96 BIFF fighters at anim na sundalo ang napatay mula nang umarangkada ang all-out offensive noong Pebrero. Nakapagtala rin ang AFP ng 31 sundalong nasugatan laban sa mga rebelde. 

Kompiyansa ang AFP na humihina na ang pwersa ng BIFF.