Torre sumisipa sa Zone 3.3

ni ARABELA PRINCESS DAWA

NAKALUSOT si Asia’s first grandmaster Eugene Torre sa round two upang itarak ang panglawang sunod na panalo sa Zone 3.3 Zonal Championships 2015 Open sa Ho Chi Minh City, Vietnam kahapon.

Kinaldag ni 63-year old Torre si Ninh Thanh Vo (elo 231) ng Vietnam para makisalo sa five-way tie sa top spot.

May dalawang puntos din si Pinoy IM Haridas Pascua nang payukuin nito ang kababayang si GM Julio Catalino Sadorra matapos ang 89 moves ng Reti opening.

Kasama nina Torre (elo 2449) at Pascua (elo 2423) sa tuktok sina GM Bayarsaikhan Gundavaa (elo 2505) ng Mongolia at IMs Htun Zaw Wynn (elo 2382) ng Myanmar at Van Huy Nguyen (elo 2452) ng Vietnam.

Masusubukan muli ang tikas ni No. 16 seed Torre sa third round dahil makakalaban niya si ranked No. 7 Gundavaa habang katapat ni Pascua si super GM at seed No. 2 Nguyen Ngoc Truong Son (elo 2659) ng host country.

Nakapuwersa ng draw si Pinoy GM Richard Bitoon kay top seed Le Quang Liem (elo 2676) ng Vietnam matapos ang 75 sulungan ng Nimza-Indian.

May tig 1.5 puntos sina Bitoon at Le kung saan ay kasalo sila sa sixth to 17th place sa event na may nine rounds swiss system.

Nakipaghatian din ng Puntos si GM Darwin Laylo (elo 2499) kay FM Minh Tuan Le (elo 2393) ng Vietnam.

Samantala, nabigo sina GM Oliver Barbosa at ang batang si IM Paulo Bersamina kontra kina Wynn at Vietnamese FM Canh Huan Hoang (elo 2348) ayon sa pagkakasunod.

Makakalaban ni Laylo sa third round si FM Jingyao Tin (elo 2326) ng Singapore habang haharapin ni Bitoon si GM Anh Dung Nguyen (elo 2461) ng Vietnam.