HS student inutas sa Pampanga resort

NATAGPUANG tadtad ng saksak at walang saplot na pang-ibaba ang isang 20-anyos high school student kamakalawa ng umaga malapit sa isang resort sa City of San Fernando, lalawigan ng Pampanga.

Ayon sa mga awtoridad, huling nakita ng kanyang ina dakong 11 p.m. nitong Sabado ang biktimang si Anthony Ambrosio, 20, estudyante ng Integrated High school sa Brgy. Balite, at residente ng nasabing lugar.

Ngunit dakong 7 p.m. nitong Linggo, natagpuang wala nang buhay ang biktima at tadtad ng saksak habang walang saplot na pang-ibaba sa bakanteng lote malapit sa Alfredo’s Resort sa lugar.

Kasalukuyang iniimbestigahan ng pulisya ang insidente upang matukoy ang motibo sa pagpatay at para mabatid kung sino ang salarin.

Raul Suscano