2 parak tiklo sa extortion

CAMP OLIVAS, Pampanga – Arestado ang dalawang pulis sa entrapment operation ng pinagsanib na puwersa ng Investigation and Detection Management Branch (IDMB) ng Angeles City Police (ACPO), at ng Tracker Team makaraan ireklamo ng robbery extortion ng isang Amerikano sa Brgy. Malabanias, Angeles City kamakalawa.

Ayon sa ulat ni Senior Supt. Eden Ugale, Angeles City Police Office (ACPO) director, sa tanggapan ni Chief Supt. Ronald Santos, Acting Police Regional Office-3 (PRO3) director, kinilala ang mga naaresto na sina PO1 Hebren Sicat, 25, ng Brgy. Salapungan, Angeles City, at PO1 Ryan Villanueva, 34, ng Brgy. Camias, Magalang, Pampanga, kapwa nakadestino red light district sa Field Avenue, Angeles City.

Ang mga suspek ay nadakip sa entrapment operation sa Narciso St., Josefa Subd., Brgy. Malabanias ng lungsod na ito makaraan ireklamo  ng isang American tourist na si George Colvin, 73, ng robbery extortion sa halagang P115,000 para sa kasong isinampa sa kanya ng isang menor de edad na nakilala niya sa nasabing lugar.

Leony Arevalo