Foul play sinisilip sa pagkamatay ng pulis-Bustos

HINIHINALANG may foul play sa pagkamatay ng isang pulis sa Bulacan na nabaril sa loob ng kanyang bahay sa Brgy. San Jose, bayan ng Baliuag, sa naturang lalawigan kamakalawa. 

Namatay habang ginagamot sa Castro Hospital ang biktimang si PO2 Denmark De Leon, 28, chief Investigator ng Bustos PNP, tinamaan ng bala sa ulo at hita.

Sa ulat ni PO2 Joselito Guevarra ng Baliuag Police, nasa silid ang biktima nang biglang dumating si PO2 Angelica Casimiro na sinasabing nakatalaga rin sa Bustos PNP. 

Makaraan ang ilang minuto, nakarinig ng tatlong putok ng baril ang ina ni PO2 De Leon na si Marilyn habang naglalaba sa labas ng kanilang bahay. 

Mabilis na tinungo ng ginang ang silid ng biktima at bumulaga sa kanya ang duguang anak na may tama ng bala sa ulo at hita.

Masusing iniimbestigahan ng pulisya ang insidente at nakatakdang isailalim sa paraffin examination ang biktima gayondin si PO2 Casimiro.

Micka Bautista