HATAW! D'yaryo ng Bayan hatawtabloid.com
ni Tracy Cabrera
NAGBIGAY ng sariling prediksyon ang tinaguriang ‘Baddest Man in the Planet’ kung paano magwawakas ang nakatakdang welterweight bout sa pagitan ng People’s Champ Manny Pacquiao at undefeated Floyd Mayweather Jr., sa Las Vegas sa Mayo 2 ngayong taon.
Ayon kay Mike Tyson, dating world heavyweight champion, ang tanging paraan para talunin ni Mayweather si Pacquiao ay gayahin ang mga estratehiya nina Juan Manuel ‘Dinamita’ Marquez at Timothy ‘Desert Storm’ Bradley.
“Kapag inisip ang dalawang mandirigma,” ani Tyson sa wikang Ingles sa kanyang YouTube channel, “mga taong nagbigay ng pinakamahirap na laban para kay Pacquiao sa kanyang career, sila ang ta-nging nakabitaw ng isang daang suntok: sina Bradley (at) Marquez.”
Ang problema, dagdag ng kontrobersiyal na boksingero, ‘economical’ si Mayweather pagdating sa pagsuntok.
“Hindi umaabot si Floyd ng isang daang suntok sa bawat round, alam n’yo ibig kong sabihin? Mas scientific fighter kaysa slugger. Masyado siyang nagpaplano, madalas siyang umuupo at nagpo-pose,” aniya.
Sa kabilang dako naman, si Pacquiao umano’y mabilis kumilos at malikot sa bawat laban niya.
“This is bad news for Mayweather,” ani Tyson.
“This guy’s all around—feinting, mo-ving… this guy’s like perpetual motion, he’s all over the (expletive) place,” wika ng dating heavyweight champion.
Bilang payo, sinabi ni Tyson na kung nais ni Mayweather na manalo, kailangang ipakita niyang siya ang nagdidikta ng laban sa simula pa lang dahil kung hindi’y may panganib na matalo siya sa bawat round laban sa mas agresibong si Pacman.
“He’s gotta come up with punches, boom, boom! Gotta keep the jab, keep the distance and move and spin with him. That guy’s like a Pacman all over the place,” kanyang pagwawakas sa kanyang YouTube channel.
