Jolo ligtas na sa critical stage

MAITUTURING na nalagpasan na ni Cavite Vice Governor Jolo Revilla ang critical stage makaraan aksidenteng mabaril ang sarili nitong Sabado.

Ayon sa tagapagsalita ng pamilya Revilla na si Atty. Raymond Fortun, sa huling resulta ng computerized tomography (CT scan), walang urgent condition sa kanyang lumaking tiyan at ang namagang mukha ay bahagi ng pagkakabaril sa baga.

Partially collapse pa rin ang magkabilang baga ng bise gobernador.

Bagama’t humina na ngunit may tumutulo pa rin dugo sa kanyang baga at aabot sa 860 cc na dugo ang huling natanggal.

Dahil sa patuloy na pagtulo ng dugo ay nakakabit pa rin ang isang chest tube para ma-drain ang dugo sa kanyang baga.

Lumabas din sa pagsusuri na na-fracture ang ika-lima at ika-anim na ribs ng nakababatang Revilla.

Gayonman, gumagana na rin ang kanyang digestive system at hindi na kailangang ibalik sa ICU ng Asian Hospital and Medical Center.

Hinihintay na lamang ang paggaling ni Jolo para makapagbigay ng testimonya sa mga awtoridad at maharap ang kanyang trabaho.