Gorayeb: Nasa amin ang momentum

ni James Ty III

NANINIWALA ang head coach ng National University women’s volleyball team na si Roger Gorayeb na kaya ng kanyang mga bata na muling talunin ang De La Salle University sa do-or-die na laro nila para sa huling silya sa finals ng UAAP Season 77 sa Mall of Asia Arena sa Pasay.

Noong Miyerkoles ay ginulat ng Lady Bulldogs ang Lady Spikers, 25-20, 25-20, 25-19, sa loob lang ng mahigit isang oras sa Smart Araneta Coliseum kahit twice-to-beat ang tropa ni coach Ramil de Jesus.

“Gusto ko lang makita, maganda ang laro ng mga bata. At talagang maganda ang nilaro nila,” wika ni Gorayeb na dating head coach ng Ateneo de Manila. “I don’t want to prepare for their (La Salle) adjustments kasi nasa amin na ang momentum.”

Ito ang ika-walong panalo ni Gorayeb sa 11 na laro mula noong hinawakan niya ang NU sa kalagitnaan ng elimination round.

Sumandal ang Lady Bulldogs sa tig-13 puntos nina Jaja Santiago at Myla Pablo, kasama ang limang supalpal ni Desiree Dadang, upang maiposte ang panalo.

“Maganda ang blocking ni Dadang,” ani Gorayeb. “Anuman ang mangyari, proud pa rin ako sa mga players ko.”

Gagawin sa alas-4 ng hapon ang huling laro ng NU at La Salle kung saan ang mananalo rito ay aabante sa finals kontra Ateneo na dalawang panalo na lang ang kailangan upang mapanatili ang korona.

Winalis ng tropa ni Alyssa Valdez ang eliminations sa kanilang 14 na sunod na panalo.

Sa alas-2 ng hapon ay tatangkain ng Ateneo na makuha ang korona sa men’s division kontra NU.

Sa pangunguna ng 31 puntos ni Marck Espejo ay tinalo ng Eagles ang Bulldogs, 25-19, 30-28, 20-25, 25-22, noong ding Miyerkoles.