4-buwan power crisis simula ngayong Marso (Babala ng DoE)

LEGAZPI CITY – Inaasahan ng Department of Energy (DoE) ang pagnipis ng kanilang reserba lalo na ngayong summer season.

Dahil dito, hindi imposibleng makaranas ng power blackout o kaya’y power shortage sa mga susunod na linggo dahil sa matinding init.

Ayon kay DOE Energy Utilization Management Bureau Dir. Patrick Aquino, nakikita na ng kanilang ahensiya ang kakulangan sa suplay ng koryente sa bahagi ng Luzon kasama na ang Bicol Region.

Sa paliwanag ng opisyal, dahil sa manipis na reserba ng DoE, sakaling magkaroon ng pagbagsak ng ilan sa kanilang mga planta, idagdag pa ang sobra-sobrang paggamit ng koryente dahil sa tag-init, hindi malayo ang maitatalang brownout sa susunod na mga linggo.

“Buong region po ‘yung ating nakikita na ninipis po ‘yung ating reserba, at dahil po manipis ang ating reserba, meron po na kung may bumagsak na planta, mas malaki ang pagkakataon na magkaroon tayo ng brownout. ‘Pag tag-init, doble kayod ang takbo ng ating mga planta, kaya doble-doble ang nage-generate na koryente, kaya mas malaki po ang posibilidad na masira ang ating mga planta,” ani Aquino.

Aniya, sa mga oras na 10 a.m. hanggang 2 p.m., posibleng magkaroon ng hindi inaasahang brownout dahil ito ang mga panahon na mas malaki at mataas ang demand sa koryente ng mga consumer lalo na ngayon summer season base na rin sa projection ng kagawaran.

Sa projection ng DoE, simula ngayong Marso 15 hanggang a katapusan ng Hunyo mararanasan ang power crisis na magiging critical period para sa kagawaran.