2 bebot itinumba ng Panoy gang

PATAY ang dalawang babae makaraan harangin at pagtulungan saksakin ng apat miyembro ng Panoy robbery holdup gang habang naglalakad kamakalawa ng gabi sa Caloocan City.

Agad binawian ng buhay ang mga biktimang sina Princess dela Cruz, 19, at Maryrose Junio, 18, kapwa residente ng Brgy. 176, Bagong Silang ng nasabing lungsod, bunsod ng mga saksak sa katawan at gilit sa leeg.

Habang tinutugis ng mga awtoridad ang mga suspek na kinilalang sina Bimbo Badiola, Arthur Badiola at dalawa pang sina alyas Bibe at alyas Along, mabilis na tumakas makaraan ang insidente.

Sa imbestigasyon ni PO3 Gomer Mappala, naganap ang insidente dakong 7:30 p.m. sa Phase 2, Package 1, Block 16, Bagong Silang.

Naglalakad ang mga biktima nang harangin sila at pagsasaksakin ng mga suspek na sinasabing may matagal nang galit sa dalawa sa hindi nabatid na dahilan.

Ayon sa mga awtoridad, ang grupo ng mga suspek ay kilala sa naturang lugar dahil sa panghoholdap at iba pang mga krimen kaya’t matagal nang tinutugis ng mga pulis.

Rommel Sales