HATAW! D'yaryo ng Bayan hatawtabloid.com
CAUAYAN CITY, Isabela – Tinamaan ng 23 saksak sa katawan ang isang 2nd year high school student makaraan paslangin ng kanyang tiyuhin na kapwa niya 14-anyos sa Vista Alegre, Bayombong, Nueva Vizcaya kamakalawa.
Ang biktima ay kinilalang si Risa Faye Galiguis, 14, at 2nd year high school sa Nueva Vizcaya General Comprehensive High School (NVGCHS), habang ang suspek na itinago sa pangalang “Totoy” ay kanyang tiyuhin na 14-anyos din at pareho silang residente ng Brgy. Vista Alegre.
Sa imbestigasyon ng Bayombong Police Station, dakong 4:30 p.m. nang dumating sa kanilang bahay si Galiguis makaraan lumahok sa street dance sa pagbubukas ng Cagayan Valley Regional Athletic Association (CAVRAA) Meet 2015 na ginanap sa Nuena Vizcaya Sports Complex sa bayan ng Bayombong.
Habang nagpapahinga ang dalagita ay dumating ang tiyuhin na si “Totoy” at siya ay pinagsasaksak sa hindi pa malinaw na dahilan.
Isinugod sa ospital si Galiguis ngunit idineklarang dead on arrival dahil sa maraming saksak sa katawan.
Naaresto at nasa kustodiya na ng pulisya ang suspek na nakatakdang sampahan ng kasong pagpatay.
