HATAW! D'yaryo ng Bayan hatawtabloid.com
MULING NAKAPUSLIT SI SGT. TOM PARA MAKIPAGKITA SA PAMILYA
Umagang-umaga ng araw ng Linggo nang tawagan ni Sgt. Tom ang misis na si Nerissa gamit ang cellphone ng kanyang nakatatandang kapatid.
“Magkita tayo mamayang alas-diyes sa Luneta…” agad niyang idiniga.
“Saan du’n?” paglilinaw ng kanyang asawa.
“Sa bandang harapan ng Chinese Garden…” pagtukoy niya sa lugar.
“Sige… Isasama ko ba si Yeye?” naitanong ni Nerissa.
“Oo, Mahal… Sabik na ako sa anak natin,” ang maagap niyang tugon.
Ginamit ni Sgt. Tom ang kotse ng kanyang Kuya Atong sa pagluwas ng Maynila. Mag-aalas-diyes pa lang ng umaga ay naroon na siya sa bisinidad ng Rizal Park. Naiparking niya ang dalang sasakyan sa isang parking area. Nabagbag ang damdamin niya sa mahigpit na pagyakap ng asawa’t anak na sabik na sabik sa kanya. Halos maluha tuloy siya. Pero ang misis niyang si Nerissa ay nalaglag ang luha sa mga mata. Kinabakasan niya ng matinding hapis ang mukha nito. At mahimalang hindi ito naging mataray sa kanilang pagkikita.
“Diyos ko, Tomas… B-bakit sobra’ng payat mo? … A-at nangangalumata ka…” pansin sa kanya ni Nerissa.
“’Di kasi ako makakain at makatulog… Mahirap ‘tong sitwasyon ko… Walang kapahingahan ang isipan,” ang naisagot niya.
“’Wag mo na kaming idagdag ng anak mo sa mga isipin… Maayos naman kaming nakararaos sa araw-araw…” alo ng misis niya na lalong humigpit ang pagyakap sa kanya.
Inilatag ni Sgt. Tom sa damuhan ang hinubad niyang jacket. Ipinagpatuloy nilang mag-asawa ang kumustahan, balitaan at kuwentohan habang nalilibang naman ang kanilang anak sa paglalaro ng iniregalo niyang PSP. Nagsilbing pakikipag-bonding na rin niya iyon sa kanyang pamilya, tulad ng iba pang mag-anak na pumaroon sa Rizal Park. Para nga silang nag-picnic doon. Pinagsalo-salohan nila roon sa pananghalian ang pagkaing inihanda ng misis niya.
(Itutuloy)
ni Rey Atalia
