Pagpasok ng Hapee sa PBA pinag-iisipan na

ni James Ty III

NGAYONG nagkampeon ang Hapee Toothpaste sa una nitong torneo sa PBA D League, malaki ang posibilidad na aakyat na ang koponan sa PBA bilang expansion team sa susunod na taon.

Ito ang iginiit ng team owner ng Fresh Fighters na si Cecilio Pedro pagkatapos na nasungkit nila ang korona sa Aspirants Cup kontra Cagayan Valley sa best-of-three finals noong Huwebes.

“I think there is room for a team like us in the PBA because we’re a consumer product,” wika ni Pedro. “I’m sure the PBA is interested in us but we need players to be competitive in the PBA. Kung wala, we will stay in the D League.”

Sa pangunguna ng mga pambatong amatyur tulad nina Ray Parks, Ola Adeogun, Garvo Lanete, Chris Newsome, Troy Rosario, Baser Amer at Scottie Thompson, winalis ng Fresh Fighters ang Rising Suns sa loob lang ng dalawang laro sa finals.

Dalawang agaw, isang lay-up at isang supalpal ni Thompson sa mga huling segundo ng overtime ang nagbigay sa Hapee ng 93-91 panalo sa Game 2.

“I was thinking, talo na pero Scottie (Thompson) saved the day,” ani Hapee coach Ronnie Magsanoc. “I was already looking forward to a Game 3.”

Nagpasalamat naman ang team manager ng Hapee na si Bernard Yang sa suporta ni Pedro nang nagdesisyon ang Fresh Fighters na sumali sa D League pagkatapos na umalis sila sa Philippine Basketball League.

“HIndi naman ako nawala sa Hapee. I moved to Jumbo and Cafe France na ang owners nila, kaibigan ni Sir Cecilio,” dagdag ni Yang. “Ngayong bumalik ang Hapee, balik din ako sa Hapee. Mas physical ngayon ang D League compared to PBL. Kung talagang pipiliin ang Hapee sa PBA, I’m willing to be team manager.”