Castro sinasandalan ng TnT

ni ARABELA PRINCESS DAWA

DOBLE kung kumayod si Jayson Castro para tulungan iangat ang Talk ‘N Text Tropang Texters sa nagaganap na PBA Commissioner’s Cup ito’y dahil sa pagretiro ni team captain Jimmy Alapag.

Binalikat ng binansagang “the Blur” na si Castro ang panalo ng TNT sa Barako Bull at Barangay Ginebra.

Humarabas ng team-high 16 points kasama ang dalawang clutch three-point baskets sa final period ang 28 anyos na si Castro upang gilitan ang Barako Bull 80-75 at ilista ang unang talo ng huli sa nasabing conference.

Dalawang araw ang nakalipas, ang dating Philippine Christian University standout, Castro ay tumapos ng 31 puntos para patahimikin ng Tropa ang Gin Kings, 104-103.

Nasundot ni Castro ang inbound pass ni Mac Baracael kay LA Tenorio upang maagaw ang bola may 2.3 segundo na lang sa orasan at kumpletuhin ang panalo ng TNT.

Nag average si Castro ng 23.5 points, 5.5 assists, 4.0 rebounds and 2,5 steals sa back-to-back wins ng Talk ‘N Text kaya nahirang siyang Accel-PBA Press Corps Player of the Week para sa period na Feb. 9-15.