Amazing: Sea lion pup nakisakay sa kayak ng pamilya

NAGING pasahero ng isang US family ang hindi ordinaryong hitch-hiker sa kanilang pamamasyal lulan ng kayak, isang cute na sea lion pup.

Ang cute na nilalang ay sumampa sa likod ng kayak, habang nagsasagwan ang padre de pamilya at dalawa niyang anak na babae sa Sterns Wharf, California.

Nakunan ng camera ng isang usisero, marami ang natuwa sa sea lion habang nagbabalanse sa likod ng kayak.

Ipinasyal ng pamilya, mula sa Orange Country, ang sea lion sa paligid ng harbour ng 20 minuto bago tumalon at lumayo.

Ayon sa local news reporters, nag-alala ang ina ng pamilya, na lulan ng isa pang kayak kasama ang pangatlong anak, sa presensiya ng sea lion.

Ngunit naging mabait ang sea lion na sumiksip pa sa padre de pamilya sa kayak, at isinandal ang kanyang ulo sa leeg ng lalaki. (ORANGE QUIRKY NEWS)