HATAW! D'yaryo ng Bayan hatawtabloid.com
ANG tradisyunal na larong luksung-tinik. (HENRY T. VARGAS)
Gaganapin ang PNoy Sports sa ika-apat nitong torneo sa pag-alaala sa ika-29 anibersaryo ng People Power Revolution sa Pebrero 15 sa Liwasang Aurora, Quezon City Memorial Circle.
Ang 4th Leg ng PNoy Sports Preventive Health Program ay pagpapatuloy ng kampanya ng Yellow Ribbon Movement (YRM) na buhaying muli ang ethnic sports sa Pilipinas at ibalik ang mga tradisyunal na larong Pinoy para sa bonding, kompetisyon, sportsmanship at pagkakaibigan.
Naging posible ito sa pakikipagtulungan nina Konsehal Mayen Juico at Bise Alkalde Joy Belmonte.
Ipinagmamalaki ni Juico ang programa na katatapos lamang sa ikatlo nitong kompetisyon sa Hacienda Luisita sa Tarlac, tahanan nina Ninoy at Cory Aquino, na silang bayani ng YRM. Dalawang-daang bata ang sumali sa edisyon sa Norte.
Ang kauna-unahang PNoy Sports ay ginanap noong Agosto 2013 sa Quezon City Memorial Circle kung saan 700 mga bata at kanilang 210 magulang ay naglaro, at ang ikalawa ay noong Nobyembre 2013 sa Rizal Park na sinalihan ng isanlibong mga bata mula sa Akap sa Bata Foundation, Leyte at Apolinario Mabini Elementary School.
Espesyal na bisita ang rap artist na si Wilson G na ipaparinig sa lahat ang kanyang mga sikat na komposisyon, na inawit din niya sa Tarlac.
