Nagsasakripisyo ako — Tenorio

ni James Ty III

NATUWA ang point guard ng Barangay Ginebra San Miguel na si Lewis Alfred “LA” Tenorio pagkatapos na naitala ng Gin Kings ang una nilang panalo sa PBA Commissioner’s Cup kontra San Miguel Beer noong Linggo.

Sa panayam ng programang PTV Sports ng People’s Television 4 noong Lunes, sinabi ni Tenorio na malaking tulong ang kanyang sakripisyo sa opensa para makaangat ang Kings at makabawi mula sa mga pagkatalo nila kontra Meralco at Barako Bull.

“Since Gilas Pilipinas days, nag-sakripisyo ako kasi I concentrated on my role bilang distributor,” wika ni Tenorio. “Kaya after Gilas, I continued on my role kasi marami kaming scorers sa team and it was a matter of getting re-adjusted to the run-and-gun style ni coach Ato (Agustin). And offensively, against San Miguel, we’re sharing the ball, kasi defensively, wala namang problema.”

Ayon pa kay Tenorio, may iniindang pilay sa paa ang kanyang kakamping si Japeth Aguilar mula pa noong panahong nasa Gilas silang dalawa kaya hindi ginagamit nang masyado ni Agustin si Aguilar.

Susunod na makakaharap ng Ginebra ang Kia sa Biyernes.

“We need to control their import (PJ Ramos) dahil sobrang laki and he can bring the ball inside. Pero overall, hopefully this is the start of the good things,” ani Tenorio.