Estibador inatado ng matansero

HALOS maatado ang isang estibador, nang tadtarin ng saksak ng isang matansero dahil sa paghahagis ng tsinelas sa anak ng huli sa Tondo, Maynila, kamakalawa.

Binawian ng buhay habang itinatakbo sa Tondo General Hospital ang biktimang si Rogelio Chiva, 32, estibador, nakatira sa Room 517 ng Bldg. 7, 5/F Permanent Housing, Balut, Tondo, Maynila.

Sumuko sa barangay officials ng Brgy.128, Zone 2, District 1 ang suspek na si Fernando Catilo alyas Vandolf, 49, matansero, nakatira sa Room 524 ng nasabi rin housing building.

Sa imbestigasyon ni SPO2 Jonathan Bautista, dakong 2:15 p.m. nang maganap ang insidente sa harap ng bahay ng biktima.

Nakaupo ang biktima sa harap ng kanilang condo unit nang maisipang hagisan ng tsinelas ang anak ng suspek na si Valdemor.

Nagalit si Valdemor kaya tinungo ang biktima at sinuntok sa mukha hanggang magpambuno ang dalawa.

Sa gitna ng pagpapambuno ay nakitang inatado ng saksak ng suspek ang biktima.

Leonard Basilio