Hindi ako magpapapogi — Pena

ni James Ty III

SINIGURADO ng beteranong sentro na si Dorian Pena na magiging seryoso siya sa kanyang bagong koponang Barangay Ginebra San Miguel.

Nakuha ng Kings si Pena mula sa Barako Bull sa isang three-way trade kung saan napunta si Jay-R Reyes sa San Miguel Beer habang si Justin Chua naman ay nalipat sa Energy.

Ang trade na ito ay pinag-aaralan pa ni PBA Commissioner Chito Salud habang sinusulat ang balitang ito.

“I will not be papogi,” pahayag ni Pena sa panayam ng www.spin.ph. “I am gonna win games. I am going to sacrifice my body out there to win. “Please tell Ginebra fans that I am gonna play hard for them as I can.”

Nagsimula si Pena sa PBA noong 2001 para sa San Miguel Beer at naglaro rin siya sa Air21 at Barako Bull.

Bago siya naglaro sa PBA ay lumarga si Pena sa Metropolitan Basketball Association para sa Negros Slashers at Pasig Rizal Pirates.

Sa US NCAA ay naglaro si Pena para sa Coppin State sa New Jersey kasama si Rafi Reavis ng Purefoods Star Hotdog.

Samantala, napili ng PBA Press Corps si Chico Lanete ng Barako Bull bilang unang Player of the Week ngayong Commissioner’s Cup pagkatapos na gabayan niya ang Energy sa dalawang sunod na panalo kontra Blackwater at Ginebra.