Mag-uutol na paslit dedbol sa sunog

TUGUEGARAO CITY, Cagayan – Patay ang tatlong paslit na magkakapatid nang masunog sa loob mismo ng kanilang bahay sa Brgy. San Lorenzo, Buguey, Cagayan kamakalawa.

Kinilala ang mga biktimang sina Ashley Umoquit, 10; Elvin, 7; at Mark Doliver, 6.

Ayon kay Senior Insp. Saturnino Soriano, hepe ng PNP Buguey, walang kasama ang mga bata nang masunog ang kanilang bahay dahil nagtungo ang mga magulang na sina Elvin at Jocelyn Umoquit sa lamay ng namatay nilang ka-barangay na may kalayuan sa kanilang bahay.

Ayon kay Soriano, posibleng nag-umpisa ang sunog sa napabayaang kalan na ginagamitan ng kahoy na panggatong dahil nagmamadaling umalis sa bahay ang mag-asawa

Kwento ng mga kapitbahay sa mga awtoridad, narinig nilang humihingi ng tulong ang magkakapatid ngunit mabilis na natupok ng apoy ang bahay na gawa lamang sa light materials.

Sinabi ni Soriano, na-trap sa loob ng bahay ang magkakapatid dahil natutulog sila nang sumiklab ang apoy.

Hindi nadamay ang 2-anyos bunsong kapatid ng mga biktima dahil iniwan ng kanilang mga magulang sa kanilang kapitbahay.

Labis ang pagsisisi ng mag-asawang Umoquit na namatay ang kanilang mga anak dahil sa kanilang kapabayaan.

(HNT)