Kelot sapilitang pinagamit ng droga 10 suspek tinutugis

NAGA CITY – Patuloy na tinutugis ng mga awtoridad ang 10 suspek na responsable sa sapilitang pagpapagamit ng shabu sa isang lalaki sa Naga City.

Nabatid na halos dalawang araw pinagamit ng shabu ang hindi nakapanlaban na biktimang si Omar Juda Nolasco, 20-anyos, patuloy inoobserbahan sa pagamutan dahil wala pa sa normal na kalagayan bunsod nang epekto ng ipinagbabawal na gamot.

Ayon kay PO2 Jenalyn Arellano, pinaghahanap nila ang tatlong pangunahing mga suspek na kinilala lamang sa mga pangalan na Waway, Froilan at Baby.

Bukod sa tatlo, tinutugis din ang pitong iba pa na nagsilbing look out sa insidente.

Nauna rito, dinala ng mga suspek ang biktima kasama ang kaibigan na si Michael Jayson, sa hindi nabatid na apartment noong Disyembre 6 ngunit pinaghiwalay ang dalawa bago isagawa ang pagpapahithit ng shabu.

Patuloy na inaalam ng mga awtoridad kung biktima rin ang kaibigan ni Nolasco na si Michael Jayson o kasabwat siya ng mga suspek.