Garin bagong DoH secretary

ITATALAGA ni Pangulong Benigno “Noynoy” Aquino III si Janette Garin bilang bagong kalihim ng Department of Health (DOH).

Si Garin ang kasalukuyang acting secretary ng kagawaran na humalili makaraan mag-leave hanggang sa tuluyang magbitiw si DoH Secretary Enrique Ona.

Sa ambush interview sa pagdalo sa inagurasyon ng bagong gusali ng Romblon Provincial Hospital, binanggit ni Aquino na gagawin niyang permanenteng kalihim si Garin dahil kuntento siya sa trabaho ng opisyal sa DoH.

Magugunitang unang nag-leave si Ona makaraan pagbakasyunin mismo ng Pangulo para ipaliwanag ang sinasabing maanomalyang pagbili sa P833 milyong halaga ng bakuna kontra pneumonia. Kinaulana’y naghain din ng resignation letter si Ona na tinanggap ng Pangulo.

Samantala, batay sa inisyal na imbestigasyon ng National Bureau of Investigation (NBI), hindi masasabing maanomalya ang pagbili ng bakuna ng DoH dahil napunta ito sa kinauukulan.

Si Garin ay miyembro ng Liberal Party (LP) na partido rin ni Aquino.

Rose Novenario