Ama naglaslas ng leeg sa selda (Hostage taker ng anak)

MISTULANG sinentensyahan ng isang adik na ama ang kanyang sarili nang laslasin ng basag na bote ang kanyang leeg nang maaresto makaraan i-hostage ang anak kahapon ng hapon sa Caloocan City.

Hindi na umabot nang buhay sa Caloocan City Medical Center ang biktimang si Even Zel Rubinas, 43, residente ng 1038 Interior 7, A. Mabini St., Brgy. 36 ng nasabing lungsod.

Batay sa ulat ng pulisya, dakong 1:45 p.m. nang maganap ang insidente sa loob ng detention cell ng Caloocan  City Police makaraan maaresto sa pag-hostage sa 10-anyos niyang anak na lalaki sa kanilang bahay dakong 11 a.m. habang armado ng basag na bote ngunit napasuko nang nagresponde ang mga tauhan ng Special Weapons and Tactic (SWAT) team.

Pero habang nasa loob ng selda, nakadampot ng bote ng patis ang biktima, binasag ito at nilaslas ang kanyang leeg.

Nabatid sa misis ni Rubinas, bago ang insidente, limang araw nang gumagamit ng shabu at hindi kumakain ang kanyang mister.

Rommel Sales