HATAW! D'yaryo ng Bayan hatawtabloid.com
TAON-TAON isa sa pinakahihintay naming Christmas party ang sa ABS-CBN. Paano’y talagang laging bida ang mga taga-entertainment press. Bukod pa sa dalawang buwan bago ang Disyembre’y pinag-iisipan na nilang mabuti kung ano ang pakulong gagawin nila sa Christmas party for the press.
Noong Lunes, ginanap ang #ABSCBNThankYouMediaParty! sa Dolphy Theater at muli napasaya nila ang mga entertainment media. Hindi man ganoon ka-fabolosa ang mga ipina-raffle, makikita naman ang mga ngiti at saya sa bawat isa.
Bukod sa mga iba’t ibang palaro na ang pinaka-highlight ay ang Bet On Your Baby na mismong si Judy Ann Santos pa ang nagpalaro, ang jamming session ng mga piling-piling movie press kasama ABS-CBN Philharmonic Orchestra ang pinakamaganda at nakatutuwang pangyayari.
Aba, ikaw ba naman ang kumanta sa saliw ng Philharmonic Orchestra, ibang level na ‘yun. Kaya tiyak marami ang nainggit sa mga kapatid sa panulat na sina Leo Bukas, Allan Diones, Dominic Rea, Alex Datu, Reyma Deveza, Nherz Almo, Glai Jarloc, Eugene Asis, Noel Orsal, Allan Policarpio, Pilar Mateo, Veronica Samio, Letty Celi, at Emy Velarde. Talaga namang nag-ala diva ang mga nabanggit na kapatid sa panulat dahil pasabog talaga ang ginawa.
Nakatutuwa rin ang pagho-host nina Ogie Diaz at MJ Felipe dahil buhay na buhay ang gabing iyon at walang dull moment, ‘ika nga. Naglaan din ng oras ang mga executive na sina Cora Vidanes at Laurenti Dyogi para bumati sa amin. Maraming salamat po.
Sa ABS-CBN management lalo na sa Integrated Corporate Communications ng Kapamilya Network na binubuo nina Sir Bong Osorio, Kane Choa, Aaron Domingo, Kathy Solis at ng mga kasama nila, maraming-maraming salamat ang babait ninyo.
ni Maricris Valdez Nicasio
